La Chucho-Moust

La Chucho-Moust de Sant-Cezaire-sus-Siagno, l’avès touti couineigudo , aquèlo que fasié d’oli amé lis óulivo de Moussu Jullian. Aquèu Moussu Jullian que s’èro acouquina amé la pichoto louiseto, sabès aquelo Louiseto qu’avié voula un parèu de braié à la Damisello Sarrat dou quiéu, qué tenié merçarié darrié la gleiso. Basto ! acò es pas lou proublèmo. Fasen pas li marrido lengo. Sian pas aqui per escriéure tóuto la tradicioun etimoulougico d’aquèu poulit vilajoun. Eici nous pagon pas per acò. Adounc, disiéu, La Chucho-Moust èro à taulo amé soun ome e sis enfant ; e, coume es un pau pico-pèbre de nature, tout lou tèms dóu soupa desmentissié sou nome, qu’èi que diguèsse. Aqueste, que sabié qu’abié resoun, sènso trop se metre en coulèro, prenié la damo-jano qu’èro sus la taulo, se vuejavo un grand goubelet de vin, lou bevié e disié : « Se ço que dise es pas la verita, vole qu’aquéu goubelet de vin m’empouisoune ! » La femo emé soun testardige revenié à lou contre-dire e l’ome, zóu, mai ! prenié la damo-jano, se vuejavo un plen goubelet de vin, lou bevié e disié : « Se ço que dise es pas la verita, vole qu’aquéu goubelet de vin ….. »
De goubelet en goubelet, lou quiéu de la fiolo coummençavo à se faire vèire. Lis enfant, esfraia :
-« Maire, faguèron, digués vite coume éu, autramen nàutri mouriren de la set ! »