Vaqui ! Lou tèms de Pasco vèn de s’acaba. Benurous tèms de Pasco amé si bèlli tradicioun groumando. Benurous tèms de Pasco, tempouro dóu Printèms, alenado dóu bèu tèms !
Aquest dimècre d’abriéu, coume tóuti li dimècre, dins la gleiso de Perno, l’Abat Martin fai soun catechisme i pichot de la proumiero coumunioun.
- Veguèn un pau, mis enfant – enreguè l’Abat Martin – Vuei, nous fau reveni sus lou miracle de la resurreicioun. Amariéu que faguessian refleissioun de ço que s’èro passa à Pasco.
Sabès tóuti que lou bon Diéu de la Biblo ressuscitè d’entre li mort lou tresèime jour.Quand Noste-Segne ressuscitè, se faguè d’abord vèire i femo pèr-ço-que d’aquéu tèms, (parèis coume li nostro) avien pas la lengo au couissin, e lou bon Diéu vouguè que la bono nouvello dóu miracle fuguèsse lèu esbrudido.
Adounc – countuniè l’Abat Martin – Noste-Segne ressuscitè. Alor, mis enfant… vous lou demande, ounte se pòu trouba vuei ?
Lou pichot Kevin fuguè lou proumié à leva lou det :
- Lou bon Dièu es dins lou Sant-Paradis, Moussu lou Curat !
Pièi, Viviano s’aubourè e respondeguè :
- Moussu lou Curat, lou bon Dièu es dins moun cor !
Miquèu, un droulas de vounge an, tout escaufa coume à sis abitudo, trapejavo de pèd dempièu un moumen au founs de la gleiso. E vaqui que s’aubourè d’un cop e cridè fieramen :
- Iéu lou sabe ! iéu lou sabe mounte se trobo !! Lou bon Diéu es encafourna dins nosto salo de ban !!
Sus aqueli paraulo, lou sang de l’Abat Martin faguè qu’un tour e, tout esbalausi, se virè devers Miquèu amé d’iue coume lou poung e ié venguè coume acó :
- Mai que conte nous fas aqui ??!!
E Miquèu diguè :
- Bèn ! Vo, Moussu lou Curat !! tóuti li matin, quouro moun paire s’aubouro, e que s’en vai à la salo de ban, l’entènde crida davans la porto :
« Bon-Diéu !! siés encaro aqui, Bon-Diéu !!!! ».
Chris Yso
/https%3A%2F%2Fprofilepics.canalblog.com%2Fprofilepics%2F5%2F6%2F568431.jpg)