Canalblog
Editer l'article Suivre ce blog Administration + Créer mon blog
Publicité
Lis istori d'Estève
24 avril 2021

COUNSÈU DE DÓUTOUR !

Dempièi quauqui tèms, Bartoumiéu se sentié tout tras. Flasquissènt pau à pau. Mouligas. Pamens, un bèu jour, Batistino, sa femo, feniguè pèr persuada soun testardas de marit d’ana vèire lou Dóutour.

Ço que fuguè di, fuguè fa. Lendeman, Bartoumiéu, acoumpagna de sa femo Batistino, anè se faire counsulta pèr lou mège de Castèu-Reinard.

La counsulto acabado, lou Dóutour Batisto de Castèu-Reinard vouguè parla un moumen à Batistino, tèsto-à-tèsto, touti dous, dins la salo d’espèro.

- Hé ! bèn Moussu lou Dóutour, de qué n’en disès ?

- Qué voulès que vous digue ? Ma bravo Batistino – ié faguè lou Dóutour Batisto- Voste Bartoumiéu es un gros malaut. Pamens, se respetas bèn escrupulousamen e rigourousamen li prescripcioun que vous vau douna, tant se poudrié que pousquessias ié sauva la vido. Adounc, veguen…Tóuti li matin, fasès ié un bon manja…uno bono soupo de caulet o de cebo, de bon pan amé de charcutarié, quauquis iòu amé de platino de lard estuba…e que sabe iéu ? A dina, parié : un bon double, d’alauso de Rose e àutri lipetejarié…e aguès pas pau de carga ! Basto ! ié fau un manja de Rei !...e parié pèr lou soupa.

Après lou dina, leissas-lou faire uno pichoto dourmido. Ié fasès jamai veni la bisco. Ié douna pas li nèr. Leissas de coustat li proublèmo que poudrien l’encagna. Fasès-ié dous o tres massage pèr semano. Demai, vous recoumande de ié douna la satisfacioun de tóuti si desiranço seissuali quento que siegue. Leissas-lou se teni pausa, leissas-lou regarda lou fouto-balo à la televisioun amé uno pichoto bierro. Acò ié fara passa lou matrassun que l’aclapo.

Ma bravo Batistino, se óusservas bèn assignadamen aqueli prescripcioun, vous proumete que voste Bartoumiéu vai se n’en sourti !

Batistino revengué, piei, trouba Bartoumiéu que coumençavo de se despacienta, em’acò s’en anèron tóuti dous.

Quouro fuguèron dins l’automoubilo, Bartoumiéu, que se languissié d’aguè de si novo, demandè à sa femo :

- He ! bèn Batistino, dequé t’a di lou Dóutour ?

  • Moun paure Bartoumiéu – ié respondeguè sa femo – sies au bout dóu cabedèu ! Lou Dóutour m’a di que poudèn pus rèn pèr tu !!

de Chris Yso.

Publicité
Publicité
Commentaires
Publicité