LOU GRAND LARTIGUE DE SANT-ROUMIÉ

À ço que se disié dins touti li cabaret de Sant-Roumié, Lou grand Lartigue dóu Mas di Poumié, tout en coutrejan’no estoublo noun liuen dis Antico, pèr faire de merinjano, avié, pèr cop d’asard, desclapa un moulounas de terraio, e touto meno de besougno e d’ustensiho de l’epoco Roumano. Un veritable tresor ! Dins lou vilage, dempièi lou Rougadou enjusqu’à la Grosso Galino, acò fasié grand brut e se lou murmuravo meme dins tóuti li boutigo dis anticàri dóu despartamen e meme de dela de la Durènço ! Se passavo pas uno semano senso que lou grand Lartigue veguèsse arriva au mas di Poumié un fourniguié de marchand de ravan o de vendèire de balandran.

Un bèu jour que Lartigue ero óucupa à legi soun journau dins l’après dina, un d’aquèlis arlèri s’acampè au mas amé sa bello autò de sport. Tre sourti de la veiture, notre ome veguè tout-d’un-tèms, lou cat de Lartigue que bevié soun la dins l’escudello. Dins un vira d’uei, l’anticàri se redeguè comte que la bolo dóu cat ero uno pèço arqueoulougico roumano, d’uno valour inestimable ! Uno meraviho !

Sènso leissa ren parèisse e pèr pas moustra soun entousiasme, l’ome faguè coume acò à Lartigue :

- « Brave ome ! Ma femo a toujour vougu un cat. Se vouliès vous desbarrassa d’aquèu, perquè me lou vendriès pas ? ».

- « E perqué noun ? respondeguè Lartigue. Dounas-me 200 € e lou cat sara vostre !».

Mau-grat que troubèsse 200€ un pau car pèr un marrit cat, l’anticàri sortiguè si sòu, pièi diguè, nounchalènt :

- « S’acò vous fai pas mai, prendrai tambèn la bolo. Ansin, lou cat sara pas despaïsa. »

E lou brave Lartigue faguè aquelo responso manifico :

- « AH NOUN ! La bolo resto eici ! Dempièi lou debut de l’annado, aquèlo bolo m’a fa vendre 15 cat !! ».

Chris Yso