......Quau se gèino vèn gibous !

Richard e sa femo:

-Digo-ié, tu !

-Vaudrié miéus que ié diguèsses !

Ansin sé parlavon Richard e sa femo, proufichant de ço que Justafré èro encaro dins soun lié. Aquéu Justafré venié d’eilabas di Pirenèu. Lou brave ome éro un ami de Richard qu’èro arriba un bèu matin à Sant-Andiòu, dóu tèms de l’espetacle d’Avignoun de « Chivau passioun ». S’èro acampa à l’oustau de Richard dóu « Clau de Verquièro » en disènt : « I’aviè longtèms que s’erian pas vist. Ai pensa te faire plesi en te venènt faire uno pichoto vesito à l’óucasioun de l’espetacle de « Chivau Passioun ». E i’avié quinge jour qu’èro aqui, manjant coume un rassaire e bevènt coume un trau, senso jamai parla de parti !

Richard amé sa femo n’avien sous proun, e cercavon un biais de se desfaire d’aqueù santi-belli encoumbrant. Es la femo que decidè, fin finale, de ié parla.

Quand Justafré se fugè leva e que aguè bégu soun boulas de café, Eliano iè diguè : « Brave ami, fara quinge jour vuei qu’avèn lou plesi de vous agué emé nautre. Vosto femo e vòstis enfant dèvon se langui. A la plaço de vosto femo atroubariéu que restas trop deforo. Ço que vous dise aqui, n’es pas pèr vous faïre parti ; mai, me sèmblo qu’un ome qu’a quita soun oustau despièi quinge jour, pòu, sènso resoun seriouso… ».

-« Avès resoun ! coupè Justafré. Ma femo e mis enfant dèvon se langui de me vèire… Ié vau telefouna de veni ! »

Chris Yzo