Li cousin de Lioun

Lou proumié dóu mes de juliet, à vuech ouro de vèspro, alor que s'entaulon, s'ausis pica à la porto.

Masclet vai durbi....soun li cousin de Lioun!...

Coume parton en vacanço sus la coustiero d'azur, an decida de veni saluda la famiho, mai aquest an se soun trouba encoumbra sus l'auto-routo, ço que li fai arriba proun tardié.

Après s'èstre poutouneja, Masclet demando i parent:

-Anas manja emé nautre ?...

-Voudrian pas desrenja !...

-Aco se vai passa à la fourtuno dóu pot!...

La maire elo, aganto li pichot à despart, e, à la chut-chut, coume i'a que quatre cousteleto, fau que digon que volon pas manja de viando !...

Lou soupa coumenço : ensalado à l'anchoio, pièi lou tour di cousteleto, e quouro soun sus la taulo , lou garçoun Fermin :

-Iéu vole pas manja de viando !...

E la pichoto :

- Iéu tambèn...la viando me dono lou bòmi !...

Li quatre gràndi persouno devourisson li cousteleto en se coungoustant...la maire vai cerca la tarto i frago deja coupado en quatre moussèu.

Li pichot se lipejon e donon la sieto fin de se faire servi;

Alor, lou paire:

-Ah !...noun !...bord qu'avès pas vougu de viando, sarés priva de dessèr !...mai quau es que coumando eici ?...sara pas li pichot tambèn !