Souveni d'enfanço: Van Gogh racouta pèr mi tanto

A Sant-Roumié i a agu uno grando revoloucioun dins lou mounde di pacan, emé la coustrucioun dóu canau dis Alpino vers li annado 1840- 1860. Avans i avié li paca de Sant Roumié emé de terro foundado dóu coustat de la plano e aquéli de canto-cigalo dóu cousta dis Aupiho, mai lou canau coupavo li terro en dos meno : li terro arrousado pèr lou canau ounté se fasié de lieume e d'aubre fruchous de touto meno, e li trescan subre lou canau pèr li oulivié, lis amelié o la vigno.

Mi avi quand eron vièi avian un jardin pèr li lièume en dessouto lou canau, e l'oustau éu ero un mas enviróuta d'uno terro d'oulivié, tout bèu jus en dessouto dis Antico dins li terro secarouso.

Entre 1889 e1890 Vincent Van- Gogh fuguère interna à sa demando à Sant-Roumié dins la clinico de Sant-Pau-de-Mausole qu'ero procho de mis avi.

Li tanto de moun paire me counteron aquello istòri, que gaire de gent couneison, e belèu resto plus que iéu pèr la saupre. Alors pèr que se perdo pas vai la parteja emé vous.

Un jour que Van Gogh se permenavo emé soun atirail de pintre à cerca un endré pèr faire un tablèu rescoutravo moun rèire grand, e i'é diguère :

-« Counèisses uno belo terro de blad ounte veiren lis Aupilho ? »

E moun reire de le mena à travers lou campestre Sant-Roumièren ounte i'avié un bèu champ de blad magnifi. Van Gogh pauso soun atirai, regardo ...trouvo tout acó tras que bèu e coume moun reire restavo à soun cousta pèr lou regarda pindre, e qu'acò agradovo pas, lou pintre digué à moun grand.

- « Reviro te ! Vai te paga pèr lou service que m 'as rendu ! » moun reire de se revira e Van-Gogh de i'é douna un grand cop de ped dins lou quièu en i' disen : « - Aro entourno te au tiéu curious que siès, vau pinta trenquilo ! ».

Desempiéi dins ma famiho an toujour parla de Van-Gogh coume dóu fada que se prenié pèr un grand pintre. Mi gens aurien jamai pouscu imagina qu'un jour aquèu fada sarié moundialamen couneigu e que si tablèu sarien dins li mai grand musèu dóu mounde.

A.Rivière