lou burèu de Poste.

Quand abitian encaro au Mas Sant Jan, me souvène qu’un bèu jour d’estiéu ma maire esperavo un còli de la Posto ; e mé mandé veire s’èro arriba.
-Bonjour, Madamo la Recevuso, ié faguère, veniéu vèire s’aurias pas un còli pèr ma maire d’eila dóu Mas San-Jan ?
-As li pèço pèr lou retira, pichot?
-Ah ! nàni. Sabiéu pas…
-Eh ! bèn, moun pichot, va t’en ié li querre.
E me vaqui mai à refaire ma lègo e miejo de camin à la bono calour d’un tantost de juliet. Arribère au mas trempa coume uno soupo.
- Mama, m’andi de veni querre li pèço pèr pousqué retira lou còli.
- Que sièu fachado, moun tresor, de te douna tant de peno emé la calourasso que fai vuei, tè, beve aquéu chicoulet e vai lèu querre aquéu còli, n’en siéu forço pressado. N’auras qu’à remetre aquest papié à la Recevuso.
Beguère moun chicoulet ; emé moun moucadou sequère la susour que me rajavo dóu front e zou mai, partiguère pèr refaire au souleias ma lègo e miejo de camin.
Enfin arriva au burèu :-Eh bèn ! Madamo, aquest cop ai li papié, ve-lèis-aqui. Me rendrés service en ma remetènt aquest còli sènso ma faire trop espéra ; siéu tout susant e voste burèu es un pau fres.
- o, ié siéu, moun pichot.
Alor madamo la Recevuso regardè li paquet un après l’autro, pièi me diguè : Eh bèn ! pichot, diras à ta maire que n’i’a ges ; sara belèu pèr un autre jour !
Aquéu jour m’ère fa la proumesso que de tout tèms e jamai, travaiarai dins un burèu de Poste. Vesès que siéu un ome de paraulo !!