UNO COUMESSIOUN BEN FACHO

Aqueilo me vèn d’un grand-ouncle, Léopold Vidau, felibre cabanèn.
UNO COUMESSIOUN BEN FACHO
« Vai lèu en Arle encò de l’abouticàri, cerca un clistèri pèr lou Mestre qu’es en trin de mouri, diguè Fefin, la tanto de Parado, à Coulau, un jouine varlet de 12 an qu’arribavo tout nòu dóu Martegue, vejaqui l’ourdounanço.
Coulau encambè la cavaloto, e dins mens d’uno ouro fuguè à la boutigo de moussu Troucho lou farmacian.
« Bonjour, moussu, voudriéu un clistèri.
-Lou voulès prendre ici, o bèn voulès que vous lou porton ? Se lou prenès eici, es vint sòu, e, se lou fau pourta, n’èi vint-e-cinq, raport à la boutiho. »
Coulau, que sabié que li gènt d’Arle veson veni li pàuri meinagié, e que couneissié tanto Fefin regardanto, respoundeguè que preferissié lou prendre.
L’abouticàri lou faguè rintra dins un pichot cantoun, e dins un vira-d’iue ié faguè avala lou bouioun pounchu caud à poun.
Noste ràfi n’en revenié pas, mai, vouguènt pas avé l’èr d’un Martegau que saup rèn de rèn, acampè un grand chut, paguè e resmountè à chivau en se demandant de queto maniero poudrié faire prouficha lou Mestre dóu clistèri que Moussu Troucho venié de ié douna.
Aguè pas fa vint pas que se retourno en se tenènt lou vèntre… Rintro coume un esclaire encò de l’abouticàri : « Tenès, moussu, vejaqui encaro cinq sòu, mai fasès-me lou plesi de lou metre en boutiho, car sènte que jamai poudriéu lou pourta enjusqu’au mas, n’ai déjà escampa mai de la mita, e lou rèsto èi pas liuen. »
Moussu Troucho, qu’avié vougu un pau rire, riguè, e dounè pèr rèn dins uno boutiho un segound clistèri à Coulau qu’après avé un pau seca si braio retournè au mas, fier coume Artaban d’avé tant bèn fa la coumessioun, e de saupre la diferènci que i’a entre prendre un clistèri o lou pourta en boutho.
Lou paure pichot me la countè en grand secrèt, me fasènt proumetre de la garda pèr ièu ; veses que siéu un ome de paraulo.
Cabano. L. VIDAU.