la pricesso e lou pichot pese

I’avié’no fes un jouine prince que voulié se marida. Mai éu voulié pèr mouié uno princesso de vièio souco, uno veritablo princesso de sang.
Lou prince partiguè, veguè forço païs, mai noun atrouvè la princesso desirado. E, pamens, voulié se marida.
Un vèspre que toumbavo d’aigo coume vaco que pisso, piquèron à la porto dóu castèu. Lou paire dóu prince anè durbi e veguè sus lou lindau uno bello chato, trempado coume uno soupo, que demandavo l’ouspitalita. La chatouno intrè, touto crentouso, la faguèron chanja de tout e ié demandèron quau èro.
-« Siéu uno princesso, respoundegué la chato ; suspresso pèr la niue e pèr l’aurige me siéu adraiado vers voste castèu, e n’ai qu’à vous gramacia de la bono acuiènço que m’avès facho. »
La maire dóu prince, pèr vèire se la chato avié di verai, anè dins la chambro ounte voulié la faire coucha, meteguè un pese sus la paiasso, e sus aquéu pese, tres matalas de lano vo de plumo. Lendeman de matin, quand la chato se levè : - Avès bèn dourmi ? ié faguè la castelano ;- Pas trop bèn, respoundeguè la chato ; sabe pas ço que i’avié de dur dins lou matalas, mai crese qu’ai la cadeno macado.
Es uno princesso dóu bon, pensè la castelano, autramen aurié pas senti un pese à travers quatre matelas. E aguènt aqui atrouva la princesso desirado, ié demandèron sa man pèr lou jouine prince qu’atrouvè la chato à soun goust, e pau après se maridèron.
Lou famous pese fuguè mes dins un escrin e garda coume uno causo di mai preciouso.
- Es egau, pèr senti un pese à travès quatre matalas, falié agué la pèu fino ! Iéu, quand ère jouine (aco es forço luen), escoundiéu li sucrarié qu’aviéu empéga à l’espiçarié de la damisello Moulin dins ma paiasso e ié dourmièu dessus coume un benurous. Es verai que siéu pas prince iéu, vous l’auriéu fa saupre dempièi de tèms !???