Li devinaio
Dous vesin e coulègo que vènon de faire l'aperitiéu à la carreto ramado, que costo rèn, e mounte se bèu pas mau, s'entornon au sièu en discutant.
Felipe Librije conto de blago e de devinaio à soun coumpan Ciriaque Derasin qu'escouto en menant la veituro; tóuti dous soun pas trop clar...e l'auto trantraio un brisounet e sèmblo meme vougué prendre d'acourchi !...
Lis dous ome an la bouco patouse, e bretounejon tamèn un pau, mai la discussioun li ten reviha !...
- Ciriaque ?
-Vo !...t'escoute!...
- Ciriaque!... qut es lou mamifèr ...qu'a quatre pato lou matin..dos à miejour...e tres lou sèr ?
Ciriaque a bèu chifra, s'esquicha la tarnavello ...mamifèr ?.. que mamifèr ?... noun vei pas !... qu'es acò ?...
- Ai proun maja de favo, dequ'es ?...
Felipe en se picant sus li cueisso dins un cacalas de rire :
-Es l'ome !...es tu, es iéu, l'ome lou matin marcho sus si quatre pato, à miejour sus dos...e lou sèr, emé lou bastoun sus tres !
E mai de rire!.....
Fau dire que soun arresta à-n-un fiò di tres coulour.
Pièi d'un cop Felipe au menaire :
-Es vert !...
Ciriaque rèsto mud
-Es vert !...
Toujour ges de responso, mai lou menaire carculo...
Aqui tout d'uno, Ciriaque s'esparpello...e d'uno voues triouflanto s'escrido :
-Es uno GRANOUIO !..............
(Esteve dóu Mas de Grichaud)